Sunday, September 21, 2008

إمصخت

آخر ابداعات حكومتنا الموقره تبي تمنع "يوتيوب" م
الخبر هذا مو نكته ولاجذبة ابريل لأنه تو الناس عليها ، ولاتضنون ان هذا الخبر علشان اقولكم لي وين يمكن توصل الحكومه بمراعات التيارات المتأسلمه ، لا أبدا هذا واقع وشوفو صورة هذا القرار


انزين قلت خنشوف على شنو يبون يوقفون الموقع ويقولون بالقرار إساءه للرسول عليه السلام ، قلت ياساتر الموقع كله يسيئ للرسول !! ولايطلع بالقرار انه تحت عنوان "القران ملحن ومرتل" فيه اساءه للرسول ونشر القران ملّحن وعلى العود - والعياذ بالله- (هذي منهم مو مني) قلت طيب خنشوف شنو هالفيديو واذا ممكن انه ينشال بروحه وسويت بحث ولقيت هذي النتايج شوفوها ياجماعة الخير انا مالقيت فيها شي أبدا. ل

إنزين اشتبي يعني تبي تقولي "يو تيوب" مافيه اساءات ؟

انا اقولكم ، اللي طلع هالقرار يبين عليه اما انه يبي يمنع الموقع وبس وقال خلنا انبهرها شوي والمشكله ماتعب نفسه ودور شي بالحقيقه موجود أبد حط عنوان من باله ويحمد ربه انه في نتايج حق هالبحث اساسا ، او انه في ضغوط من تيارات او نواب او ايا يكن لوزارة المواصلات ومضايقهم هالموقع لسبب او لآخر

بس ودي اقول نصيحة حق اللي مطلع هالقرار اذا تبي مره تمنع الموقع قول تحت عنوان

Porn

وايد احسن راح تلقى شغلات اتعجبك :) ك

الحين الجانب الثاني من الموضوع اللي تعبنا واحنه انكرره لكن كثر التكرار يعلم "الحمار" ماني مجامل كلّش!! ب

أولا: المواقع ماراح تقدرون تمنعونها لو اتعنقزون يا جماعة الخير علشان جذي اقول عقلو وخلو الناس اهيا اللي تختار وتعرف الصالح من الطالح

ثانيا: متى راح تفهمون انه كل شي فيه زين وفيه شين ؟ يوتيوب مثل ما انه فيه امور جنسية (مع العلم انه مو هذا سبب منعه) ترى فيه ايات واحاديث وقرآن وخذ مثال التلفزيون او حسب ماتسمونه التلفاز الواحد يقدر يحط افلام اباحية ويقدر يحط قناة اقرا ولا اثراء هذي مالتكم ، فهمو و والله ما اتوقع انكم راح تفهمون أبد!! ي

والحين بحطلكم مثال واقعي لعل وعسى تفهمون شوفو معاي

عالميا "يو تيوب" ثالث اكثر موقع يدخلونله الناس ومحليا (يعني بالكويت) هم ثالث اكثر موقع الناس يدخلونله ، يعني الحين انتو تبون تمنعون اكثر المواقع شعبيه بالعالم والكويت - وسبحان الله - الكويت متفقه مع العالم اخيرا

وابيكم تشوفون هم بقائمة اكثر المواقع اللي يدشونها بالكويت الموقع اللي ماخذ الرقم 36 هذا الموقع من بين اكثر 50 موقع الكويتيين يدخلونهم وبالترتيب العالمي ماراح تلقونه من اول 100 موقع اتوقعون كثر المنع راح يخلي هذا الموقع واللي اهوه بروكسي يصير اب اي ترتيب ؟ ولاتصيرون شطار تحاولون تمنعونه ماراح تقدرون!!ي

على اي حال : "كثر الكبت يولد انفجار" لازم تفهمون هالنقطه وتحطونها على بالكم عدل وانه بهذا الزمن ماراح تقدرون تمنعون ففي الف طريقة وطريقة لتجاوز هالمنع .. فهل من مدكر؟

على نفس نمط المنع الغبي في خوش موضوع عن منع "سكايب" شوفوه

مصدر الخبر وصورة القرار من جريدة الجريدة

6 comments:

Q8Sky said...

معلومه:
موقع يوتيوب يحذف الفيدو اللي فيه تعدي على حقوق المكلية الفكرية او امور جنسية بحته او اساءات دينيه فور التبليغ عنها

ZooZ "3grbgr" said...

مابقى شي
خل يشيلون كل أنواع التكنلوجيا ويطونا بقوطي فيه فتحه ويركبون فيها شاشة يعرضون فيها اللي المفربوض نشوفه
والله انحرق قلبي

Fskra said...

eL mshkla mo fehom el mshkla fena
e7naa eli kil ma ygolon shay or
y9droon qarar glna Ok o sktna !
eL mfroth ma nskt ..

:/

Mishari said...

يا معود اشوة نفو الخبر

Makintosh said...

مو لانه ماعندهم شي
هادين مشاكل الديره والكويت كل مالها وترد لي ورااا

الصراحه الموضوع سخيف والي مطالبين بهالشي اسخف
يعني ياكثر المواقع الاباحيه بالانترنت
الي يبي يشوف هالوصاخه عنده الف مصدر ومصدر مو راد على اليوتيوب
واذا كان في اساءه للدين هم في مدونات ومنتديات ومواقع ضد الدين يعني مو راده على اليوتيوب

الصراحه كل الي بيدنا انه ندعي لهم بالهدايه وتثبيت العقل

صبا said...

ماعليك من قراراتهم

خرابيط

ويين بوست العيد ؟؟؟؟؟؟؟؟؟


عيدك مبارك
وكل عام وانت بخير