Saturday, July 26, 2008

اللهم ادي الزعيم بطيخ من غير بزر

..
من زمان عنكم مشاتقلكم مادري اذا في احد راح يقرى هالبوست بعد طول غياب ولا لأ بس عالعموم ماكو موضوع معين ابالي مريت ابحالة "تقوقع" ذاتية تقدرون اتسمونها اراقب من بعيد الامور واتحسف على كل شي قاعد يصير ابهالديره شغلات والله الواحد يعوره قلبه واهوه يشوفها من موضوع الشيخ أحمد باقر - قدس الله سره - إلى مواضيع طويله ثانية الواحد مايدري لي أي جهه يبون يوصلون هالديره لها
..
قلت ماكو امس خل اطلع واروح اشوف فلم عادل إمام اليديد "حسن و مرقص" دام انها "عطلة نهاية الإسبوع" حسب التسمية السلفية وقلت ماراح اشوف الفلم يوم السبت هم عشان مايزعلون علينا اخوانه السلف لأنه يوم السبت مثلكم عارفين اهوه يوم عطله مو لنا للكفره الزنادقه الصابئة اليهود الملاعين "عليهم اللحمه" مثل ماقال عادل إمام ، اي عادي لازم ادخلكم مود عادل امام لاني داش فلمه
..
قلت بروح السينما مبجر وشفت اي سينما اللي فيها كراسي لقيت "سوق شرق" والله لا يراويكم سوق شرق من السياره زحمه مالها اول من اخر قلت عسى ماشر اشصاير كل هذا احنه بس مليون! والناس زحمه بسوق شرق والافنيوز والمارينا والفنار والصالحية والشاليهات والمطار مايصير!! المهم لقيت مسفط يم "مركز سلطان" توكلت على الله ونزلت مع اللي كان طالع معاي ولا ماكو الا واحد من الاشاوس الـسكيورتي
..
يقولي: "عفوا اخوي مايصير تدخل بس للعوايل" ي
..
قلت: الله واكبر الحين انا بالكويت وبمركز سلطان مايصير ادش لانه بس للعايلات يالله ماعلينا قلت للسكيورتي ليش يبه مايصير ندش شاللي بصير
..
قالي: "اعذرني اخوي هذي تعليمات الادارة" ب
..
قلتله: انزين الحين هذا طول اليوم مايصير؟
..
قالي: " لا بس اب اوقات معينه" ي
..
اشوي ولا رفيجي اللي معاي يسحبني ويقول "يالله خل نمشي مو احنه قاعدين بالسعوديه وأنا مادري" ي
..
اي والله صدق اللي حتى مركز سلطان اللي يزين محله بالكريسماس -والعياذ بالله- قام يقول للعوائل فقط! ص
؟؟
ماعلينا دشيت المول ولا اشوف بشر اول مره اشوفهم قلت الله واكبر جذي احنه وصلنا المشكله اشكال وانواع اول مره اشوفهم مامرو علي واللي مو مصدقني خل يغلط غلطتي ويروح سوق شرق بالويك اند الياي ويشوف! ي
..
ماشي بطريجي وشفت الفلم ابصراحه فلم كان له قصه وايد حلوه تتكلم عن التعايش بين المسيحيين والمسلمين ابمصر وشلون في ناس من الطرفين يحاولون يثيرون الفتنه بين الطرفين بين الناس المتطرفين وشلون انه عايلتين عاشو مع بعض بطريقة حلوه لمه كانو يضنون انه اللي جدامهم على نفس مذهبم وشلون تبدلت الاحوال لمه عرفو الحقيقه ، على العموم مابي احرق عليكم القصه
..
لكن بطلب منكم انكم تتخيلون هالفلم على الواقع الكويتي وشلون انه يمكن تنثار الفتنه بين السنه والشيعه ولي وين ممكن توصل اذا كان في ناس من الطرفين يصبون البانزين على النار ، وبلوغ اخوي سرحان ذكر موضوع جميل عن هالموضوع انصحكم تقرونه
..
عالعموم ماعلينا قلت اسلم عليكم من زمان عنكم :)
..
واشرايكم باللي حاطها بيرجر كنج على بابه عجبني
"خليها على طريقتك واسحب اذا اردت لكن هذي المسكه عنيده جدا"
طريقه حلوه ويازتلي تقدر تتكلم فيها عن الحاله اللي حاصلة عندنا يا اعضاء مجلس الامه تقدرون انكم تأزمون الحاله السياسية لكن الشعب يبي التنمية والشعب عنيد ابهذا الموضوع جداَ
,,
اخليكم مع عادل إمام



8 comments:

why me said...

صج ؟؟

ممنوع دخول مركز سلطان الا للعوائل


!!



زين بالله تبي تشتري كاكاوو ؟؟



شنوووووووو هالمخ


MY GOD

As YoU LiKE said...

من وين داش مركز سلطان ؟
اذا من داخل المجمع راح يقولك عوائل، على انه صايدك تلحق احد !

واذا من برا .. يخلونك تدش عادي :)

JooJ o MaJooJ said...

امبييه إنصدمت من متى سلطان للعائلات أهم شي؟؟
وانتا الله يهداء في أحد اروح شرق بالويك أند..ألحين الكويت ماتنبغى بالعطل ظييم من الزحمة و الأشكال..شوقتني عالفليم يبيلا:)
جووج

Q8Sky said...

why me
قولي يالله كاكاو ماله داعي انزين ليش حاطين محلات فيها هدوم رياييل اذا الرياييل مايدشون! يعني ابهالحاله مرتي اهيا المحرم مو انا

as you like
المشكله انه من برّه على بونا سافط سيارتي يم مركز سلطان ، بالله هذي شلون ترهم

jooj
ما أولتلك ماهي غلطه ومش حعيدها تاني ، الفلم لاتطوفينه ومثل ماوصيتج طبقيه على الواقع الكويتي

سرحان said...

اللهم بطّخخخووووووو

فتى الجبل said...

الله يستر لا يصير فينا نفس اللي صار بالفيلم

Blog 3amty said...

حمد الله على السلامة :)
نورّت المدونة :P

Q8Sky said...

sar7aan
بطخوو بحئ قاه النبي

فتى الجبل
الله يستر على هالديره على قولة القايل ماكولة ومذمومه!

blog 3amety
ماهو انت اللي نورت ياباشا ;p